ຂໍຖວາຍມຸຖິຕາສັກກາລະ ຊື່ນຊົມຍິນດີນຳພຣະອາຈານ ສີສຸກ ສະເຫຼີມຄຸນ ເນື່ອງໃນໂອກາດສຳເລັດການສຶກສາລະດັບປະລິນຍາເອກ, ສາຂາບໍລິຫານການສຶກສາ, ຈາກມະຫາວິທະຍາໄລມະຫາມະກຸດຣາຊະວິທະຍາໄລ ເມືອງສາລາຍາ ແຂວງນະຄອນປະຖົມ ຣາຊະອານາຈັກໄທ ເມື່ອວັນທີ 17 ທັນວາ 2022 ຜ່ານມານີ້. 

ພຣະອາຈານ ສີສຸກ ເປັນຜູ້ໜຶ່ງທີ່ທຸ້ມເທ່ ເອົາໃຈໃສ່ການສຶກສາສາຍສາມັນ ຕາມລຳດັບຕັ້ງແຕ່ລະດັບປະຖົມ ຈວບຈົນ ອຸດົມສຶກສາ ຄື ປະລິນຍາເອກ ເຊິ່ງເປັນລະດັບສູງສຸດຂອງລະບົບການສຶກສາທາງໂລກ.ແນວໃດກໍດີ ໃນທາງທັມແລ້ວ ພຣະອາຈານຍ໌ ກໍເອົາໃຈໃສ່ ໜັກແໜ້ນ ແລະ ໂດດເດັ່ນໃນເລື່ອງຂອງວຽກງານການເຜີຍແຜ່ ການປະຕິບັດ ແລະ ການຈັດການກິດຈະການທາງສາສະໜາຊ່ວຍເຫຼືອພໍ່ແມ່ ຄູບາອາຈານ ຜູ້ຫຼັກຜູ້ໃຫຍ່ ພາຍໃຕ້ ສູນກາງອົງການພຸດທະສາສະໜາສຳພັນແຫ່ງ ສປປ.ລາວ.

ປັດຈຸບັນ ພຣະອາຈານ ສີສຸກ ສະເຫຼີມຄຸນ ເປັນຫົວຫນ້າໜ່ວຍງານສື່ປະຊາສຳພັນ ຂອງກັມມາທິການເຜີຍແຜ່ສີລະທັມ ແລະ ປະຕິບັດກັມມະຖານ,ຄະນະກັມມະການ ສູນກາງ ອົງການພຸດທະສາສະໜາສຳພັນແຫ່ງ ສປປ.ລາວ, ທັງເປັນໂຄສົກ, ພິທີກອນທາງສາສະໜາ,ເປັນຜູ້ຮ່ວມກໍ່ຕັ້ງ ແລະ ຜູ້ດຳເນີນລາຍການ ສະຕິມາ ປັນຍາເກີດ ອອກອາກາດທາງສະຖານີວິທະຍຸກະຈ່າຍສຽງແຫ່ງຊາດລາວ FM 95.00 MHz.